نماز مسنون اور روزمرہ کی دعائیں

 اسلامی تعلیمات کی اساس عقائد و عبادات ہیں۔ انھی عقائد کی پختگی اور عبادات کے ذوق و شوق سے اسلامی سیرت پیدا ہوتی ہے۔ تمام عبادات اپنے اپنے مقام پر ایمانی چلا اور تعلق باللہ کی استواری اور پائیداری کا باعث ہیں مگر ان میں نماز کو دین کا ستون اور آنکھوں کی ٹھنڈک قرار دیا گیا ہے ۔ قرآن مجید میں مسلمانوں کی زندگی کی ہمہ نوع اور تمام تر کامیابیوں کی اساس نماز کو قرار دیا گیا ہے ۔ یہ نصرت الہی کے حصول کا موثر ترین ذریعہ ہے مگر افسوس صد افسوس کہ مسلمان کہلانے والوں کی ایک کثیر تعداد ان ایمانی نعمتوں سے محروم زندگی گزار رہی ہے اور جن کو حق تعالے نے نماز ادا کرنے کی توفیق دی ہے، ان کی ایک خاص تعداد اسے مسنون طریق پر ادا کرنےسے بوجوہ قاصر ہے۔

نماز کی اسی اہمیت وفضیلت کے پیش نظر فضیلت الشیخ حافظ صلاح الدین یوسف نے مسنون نماز کی یہ کتاب آسان اسلوب میں ترتیب دی ہے۔ جس کی سب سے بڑی خوبی اس کا صحیح احادیث سے استدلال ہے۔ اس میں قارئین کی سہولت کے لیے تمام ضروری مسائل کو اختصار سے دو ٹوک انداز میں پیش کیا گیا ہے۔ نماز کے علاوہ اس میں طہارت، وضو، اذکار مسنونہ اور مختلف مواقع کی مسنون دعاؤں کی شمولیت سے یہ کتاب نماز کے آداب و مسائل کا مختصر انسائیکلو پیڈیا بن گئی ہے۔ راست رو اور حقیقت شناس حضرات اس کے مطالعہ و عمل سے اِن شاء اللہ ذوق عبادت کا لطف و سرور حاصل کریں گے ۔ اس کتاب کی پیش کش میں حسن کتابت اور اعلی ذوق طباعت نے دار السلام کی مطبوعات میں ایک عمدہ روایت کا اضافہ کیا ہے۔