اسلامی معاشرت

دین و شریعت عقائد و عبادات کے ایک مخصوص نظام اور وضع کا نام ہے۔ اسلامی عقائد کا سب سے قومی اور مضبوط مظہر اس کی معاشرت میں کارفرما ہوتا ہے یہ معاشرت اور اس کے اوضاع واطوار جس قدر اپنے عقائد کے عکاس اور ترجمان ہوں گے ان میں اسی قدر سنجیدگی، پختگی اور سیرت سازی کا ساز و سامان موجود ہوگا۔

اسلام سے قبل نجد و حجاز کے علاقوں میں ایک کافرانہ اور مشرکانہ معاشرت تھی ۔ اس معاشرت کے سارے کوائف جاہلیت کے رسوم و رواج سے وابستہ تھے مگر یہ عقیدہ توحید کا فیضان تھا کہ نبی اکرم ﷺ نے تئیس سال کے ایک مختصر ترین عرصے میں انتہائی قلیل وسائل کے ساتھ ایک عظیم معاشرتی انقلاب برپا کر دیا۔ یہ معاشرتی انقلاب سر تا پا اسلامی عقائد اور اس کی بنا پر اٹھنے والی تہذیب و ثقافت سے ہم آہنگ تھا۔
چودہ صدیاں گزرنے کے بعد اسلامی معاشرے اور معاشرت کی وہ شکل باقی نہیں رہی جس کا مطالبہ کتاب وسنت یا سیرت کا تقاضا ہے۔ عہد حاضر کا ذہنی انتشار اور قلبی اضطراب اس وقت تک ختم نہیں ہو سکتا جب تک ہم ایک مرتبہ پھر اپنی معاشرت کا رنگ ڈھنگ کوہ فاران کی چوٹیوں سے بلند ہونے والے پیغام الہی کی روشنی میں اختیار نہیں کرتے ۔
ادارہ دار السلام نے امت کی اس دینی ضرورت کو محسوس کرتے ہوئے اسلامی معاشرت کے خدو خال کو احادیث نبویہ صحیحہ کی روشنی میں جاننے اور متعارف کرانے کی یہ علمی کوشش کی ہے۔ اللہ تعالیٰ قبول فرمائے۔